撰文：Nicole Fung

你平日發嘅夢究竟係彩色定係黑白色嘅？相信大部分人都會話係有顏色。大家可能唔明點解會問呢條問題，因為覺得我哋生活嘅環境充滿顏色，咁發嘅夢就當然有顏色啦！但原來除咗身處嘅環境之外，仲有其他重要因素影響我哋夢境嘅顏色。

20世紀初有心理學家做咗一個有關夢境顏色嘅調查。發現277位大學生裡面，有高達70.7% 都從未/ 幾乎沒有發過有顏色嘅夢。當時心理學家都一致認為夢境都係黑白色，只係喺情緒化嘅夢境情節裡面畫面先會偶爾出現顏色 (Middleton, 1942)。但五六十年代後，就越來越多人開始話自己嘅夢境是有顏色。而在2001年，更有研究發現喺一班大學生裡面，大約56.5% 平日夢境都係有顏色嘅(Schwitzgebel, 2003)。

咁點解隨著時間，我哋夢境會變得越來越色彩繽紛呢？

心理學家就認為呢個現象同我哋文化背景有關。20世紀初，因為黑白視頻興盛，當時嘅人經常接觸黑白媒體📰。而嗰啲黑白媒體會透過改變我哋看待事物的色彩配搭，從而影響我哋夢境呈現嘅形式💭。

但隨著科技進步，彩色媒體遍佈喺我哋生活各個角落。當我哋接觸有顏色媒體嘅時間越長，夢境顏色就會變得越豐富 (Schwitzgebel, Huang & Zhou, 2006)。咁係因為喺接觸有顏色媒體嘅時候，我哋嘅專注力同情感都會特別高漲，從而喺我哋腦裡面留下深刻印象 (Murzyn, 2008)。所以，呈現出嚟嘅夢境亦會變得有色彩。

大家又有冇試過發黑白色嘅夢呢？照以上解釋，成長喺唔同年代嘅人夢境中又會唔會有不同顏色呢？不妨問問公公婆婆，可能會搵到有趣嘅答案！